Þessar samlokur eru sannarlega af betri gerðinni. Smávegis lúxus en samt svo einfaldar og fljótlegar. Á milli tveggja glænýrra sneiða af súrdeigsbrauði koma vænar sneiðar af brie osti, stökkt beikon, rifinn ostur, klettasalat og punkturinn yfir i-ið er sultaður balsamik laukur sem fullkomnar bragðið. Grillaðar í blússheitu samlokugrilli og bornar fram með fersku salati. Þær passa ótrúlega vel sem hádegisverður, léttur kvöldverður eða jafnvel á bröns bakka og þá jafnvel skornar í fleiri bita.
Innihald:
4 þykkar súrdeigsbrauðsneiðar
3/4 Brie eða annar hvítmygluostur
6 þykkar beikonsneiðar, eldaðar þar til þær eru stökkar
Klettasalat eftir smekk
Rifinn ostur eftir smekk
½ krukka Sultaður Balsamik laukur frá Ora
Smjör til þess að smyrja samlokurnar að utan
Flögusalt
Aðferð:
- Steikið beikonið á pönnu eða bakið í ofni þar til það er orðið stökkt. Þerrið fituna á eldhúsbréfi og setjið til hliðar.
- Skerið fjórar sneiðar af góðu súrdeigsbrauði. Mér finnst best að kaupa brauð skorið þar sem mér þykja fyrirframskornu sneiðarnar of þunnar.
- Skerið brie- ostinn í sneiðar og raðið á tvær brauðsneiðar.
- Raðið beikoninu á ostinn og dreifið lauknum jafnt yfir beikonið.
- Setjið það magn af klettasalati sem ykkur hugnast yfir laukinn og toppið með rifnum osti eftir smekk.
- Lokið samlokunum og hitið mínútugrill með riffluðum plötum eða þykkbotna pönnu.
- Smyrjið efra brauðið með smjöri og færið samlokuna að grillinu og leggið þær með smjör hliðina niður á plötuna. Smyrjið efra brauðið með smjöri og grillið (eða hitið) þar til þær eru vel gylltar og osturinn bráðinn.
- Setjið þá á disk með blönduðu salati og stráið flögusalti yfir.
Færslan er unnin í samstarfi við Ora & Ísam.