Valgerður Gréta G. Gröndal Ef þið farið í göngur, skíðaferðir eða stundið útivist sem útheimtir mikla orku þá er þetta fullkomið nesti fyrir ykkur! Nú eða bara ef þið eruð eins og ég, elskið hreinlega hvers kyns granóla stykki eða klatta sem pakkaðir eru af allskonar gúmmelaði og góðri næringu.
Þessir klattar eru svo hrikalega góðir og einfaldir, innihalda náttúrulega sætu og eru auk þess vegan! Mitt allra uppáhalds, kókos- og möndlusmjörið frá Rapunzel gefur einstakt bragð og heldur þessu öllu saman ásamt banananum. Klattana er auðveldlega hægt að frysta og taka út eftir þörfum og svo er líka hægt að skipta út fræjunum fyrir aðra tegund eða möndlunum út fyrir aðrar hnetur eða jafnvel sleppa þeim og auka magn af öðru í staðinn. Þessa uppskrift er hægt að leika sér endalaust með!
Innihald:
1 stór þroskaður banani
140g möndlu & kókosmjör frá Rapunzel
3 msk. hlynsíróp
1 tsk. vanilludropar
180g grófir hafrar
50g 70% súkkulaði, smátt saxað
40g möndlur, fínt saxaðar
40g graskersfræ
40g rúsínur
25g kókos
1 tsk. kanill
¼ tsk. matarsódi
¼ tsk. salt
Aðferð:
- Byrjið á því að hita ofninn í 175°C blástur.
- Saxið möndlurnar og súkkulaðið og setjið til hliðar.
- Setjið bananann í skál og stappið vel. Bætið möndlu- & kókossmjöri, hlynsíróp og vanilludropa út í og hrærið vel.
- Setjið hafra, súkkulaði, möndlur, graskersfræ, rúsínur, kókos, kanil, matarsóda og salt í skál. Hrærið vel saman.
- Setjið bananablönduna saman við.
- Takið fram ofnplötu og setjið á hana bökunarpappír. Mótið smákökur með ískúluskeið eða tveimur matskeiðum. Þrýstið aðeins á þær svo þær fletjist út.
- Bakið í ca. 20 mín.
- Leyfið kökunum að kólna í smástund á plötunni og færið þær síðan yfir á smákökugrind og leyfið þeim að kólna alveg.
Unnið í samstarfi við Gerum daginn girnilegan.