Valgerður Gréta G. Gröndal Þegar aðventan heilsar með öllu því sem henni fylgir finnst mér dásamlegt að geta gripið í eitthvað létt og næringarríkt. Þetta salat er einstaklega fljótlegt og einfalt og er þar að auki vegan. Baunabuffin frá Perfect Season geymast vel í frysti og engin þörf er á að affrysta þau áður. Ég skelli þeim meira að segja í airfryer-inn til þess að flýta enn meira fyrir mér. Salatið og sósan geymast vel í kæli og þetta er því einnig snilldar máltíð til að útbúa fyrirfram og taka með í nesti í vinnuna.
Innihald:
1 bolli brún hýðishrísgrjón, ég notaði frá Rapunzel
Hvítkál, skorið í strimla
Ferskt rauðkál, skorið í strimla
½ rauðlaukur, saxaður smátt
½ rauð paprika skorin smátt
2 gulrætur, skornar smátt
¼ bolli ristaðar kasjúhnetur
1 pakkning baunabuff með dilli frá Perfect Season
Hvítlaukssósa
1 dós sýrður hafrarjómi, ég notaði frá Oatly
2 hvítlauksrif marin,
Safi úr hálfri sítrónu
3 msk. ljóst tahini
1 tsk. hlynsíróp
1 msk. þurrkuð steinselja
Salt og pipar
Aðferð:
- Byrjið á því að útbúa sósuna. Setjið öll hráefni saman í skál og hrærið saman. Setjið inn í kæli á meðan salatið er útbúið.
- Sjóðið hrísgrjónin samkvæmt leiðbeiningum.
- Ristið kasjúhneturnar á þurri pönnu og setjið til hliðar.
- Skerið grænmetið og setjið til hliðar á meðan hrísgrjónin sjóða.
- Hitið buffin í airfryer eða steikið á pönnu. Ég tek þau beint úr frysti og set þau frosin í pottinn eða á pönnuna. Ég hitaði buffin á 200°C í 6-7 mín á airfryernum.
- Þegar hrísgrjónin eru tilbúin eru þau sett í skál og grænmetinu og kasjúhnetum blandað saman við. Berið strax fram með því að setja salat á disk og buffin ofan á. Setjið sósu á eftir smekk.
Unnið í samstarfi við Gerum daginn girnilegan