Valgerður Gréta G. Gröndal Það er einhver dásamleg nostalgía fólgin í marsípani og kokkteilberjum. Þessi jólin er ég búin að fara í marga hringi með eftirréttinn á aðfangadagskvöld. Alla klassísku og góðu eftirréttina, allra handa ísa og ég veit ekki hvað. En nú er ég með hamborgarhrygg en hann hef ég ekki haft á jólum í mörg ár. Það kallar á eitthvað álíka klassískt og því varð þessi ís til. Minnir á gamla tíma, rautt flauel, músastiga og marglituð jólaljós.
Innihald:
4 stór egg, aðskilin
70g sykur
100g Ren rå marsípan
1 krukka rauð kokkteilber
100g saxað súkkulaði
500ml rjómi
3 msk vökvi frá kokkteilberjunum
Aðferð:
- Þeytið eggjarauður og sykur í einni skál.
- Stífþeytið eggjahvíturnar í annarri skál.
- Skerið marsípanið og kokkteilberin í litla bita. Skiljið eftir 4-6 ber til skrauts.
- Stífþeytið rjómann.
- Blandið rjómanum saman við eggjablönduna með sleikju. Setjið marsípan, kokkteilber, súkkulaði og vökvann frá berjunum út í og blandið varlega með sleikjunni.
- Að síðustu setjið þið eggjahvíturnar út í og blandið saman við með sleikju. Passið að gera það varlega svo þeytingin fari ekki úr hvítunum.
- Setjið í 2 form að eigin vali. Frystið að minnsta kosti yfir nótt.
