Valgerður Gréta G. Gröndal 24 stk.
Á hverju ári fögnum við ástinni og fjölbreytileikanum á Hinsegin dögum sem enda í allsherjar partýi og ást í Gleðigöngunni. Við fjölskyldan bjóðum í bröns fyrir gönguna og förum svo öll saman í bæinn þar sem við fögnum saman og sýnum barninu okkar, vinum og fjölskyldu ást okkar og samstöðu í þeirra mikilvægu baráttu. Það er mikil gleði og stemning í þessum litríku bollakökum og við berum þær fram í brönsinum ásamt fleira góðgæti enda mikilvægt að ganga inn í gleðina með nóg af orku fyrir daginn.
Gleðilega Hinsegin daga kæru vinir! Ástin sigrar allt!
Innihald:
½ bolli jurtaolía
60g mjúkt smjör
4 egg við stofuhita
2 tsk. vanilludropar
¾ tsk. ekta vanillukorn eða 2 tsk. vanillusykur
2 og ¾ bolli hveiti
2 tsk. lyftiduft
¾ tsk. matarsódi
½ tsk. fínt sjávarsalt
1 bolli súrmjólk
Aðferð:
- Hitið ofninn í 175°C blástur. Setjið muffinsform í þar til gerða muffins bakka.
- Setjið olíu, smjör og sykur í hrærivélaskál og þeytið – Skafið niður hliðarnar og þeytið í 5 mín þar til blandan verður ljós og loftmikil.
- Setjið eitt egg í einu saman við, látið vélina vinna í nokkrar sekúndur á milli.
- Blandið saman þurrefnum í skál og hrærið aðeins saman með gaffli eða písk.
- Setjið helminginn af þurrefnunum saman við og hrærið þar til deigið er rétt byrjað að koma saman. Setjið súrmjólkina og restina af hveitinu út í og hrærið ekki lengur en bara rétt þannig að deigið sé samfellt og kekkjalaust. Skafið hrærarann og hliðarnar á skálinni með sleikju og takið skálina úr hrærivélinni. Hrærið aðeins í deiginu með sleikjunni til þess að ganga úr skugga um að deigið sé allt komið saman.
- Fyllið formin að 3/4. Bakist í 20 mín. Fer eftir stærð formanna og ofnum. Fylgist bara vel með eftir 15 mín og ef tannstöngli sem stungið er í eina köku kemur hreinn upp eru þær tilbúnar.
- Kælið kökurnar alveg áður en þær eru fylltar með jarðarberjafyllingunni.
Jarðarberjafylling:
450g frosin jarðarber
130g sykur
1 tsk. sítrónusafi
Setjið allt saman í pott og hitið rólega upp. Þegar sykurinn er farinn að bráðna vel hækkið þá hitann og sjóðið saman í 30 mín. Merjið berin með kartöflustöppu eða gaffli. Þegar fyllingin er tilbúin, setjið hana þá í sigti og merjið berin í gegn og blandið öllu saman aftur. Látið kólna alveg áður en fyllingin er sett í kökuna.
Regnbogakrem og skraut:
350g mjúkt smjör
500g flórsykur
2-3 msk. rjómi við stofuhita
2 tsk. vanilludropar
Gel matarlitir – Fjólublár, blár, grænn, gulur, appelsínugulur og rauður
Pastelperlur frá Dr. Oetker til skrauts
Regnbogakökuskraut frá Dr. Oetker
Plastfilma
Sprautupoki með 2M stút
- Byrjið á því að setja smjörið í hrærivélina og festið þeytarann á. Þeytið smjörið eitt og sér í 5 mín eða þar til það er orðið nánast hvítt og mjög létt í sér.
- Sigtið flórsykurinn saman við og byrjið að hræra, bætið þá rjóma og vanilludropum saman við og þeytið á mesta hraða í 10 mín.
- Setjið 100g af kremi í litlar skálar og litið hverja skál með einum regnbogalit. Mér finnst gott að geyma aðeins af ólituðu kremi og hafa nokkrar ólitaðar.
- Takið ca. 50cm af plastfilmu og setjið eina rönd í einu af kremi á plastfilmuna. Ég byrja á fjólubláa, fer svo í bláa, þá græna, gula, appelsínugula og síðast rauða. Rúllið plastfilmunni upp svo að þykk „pylsa“ myndist og snúið upp á endana á plastfilmunni. Komið stútnum fyrir í sprautupokanum, klippið annan endann af og setjið krem „pylsuna“ inn í sprautupokann.
Samsetning:
- Takið kremstút (hægt að nota þann sem fer í sprautupokann, muna þá bara að gera þetta áður en sprautupokinn er settur saman). Leggið breiðari endann á stútnum á miðjuna á hverri bollaköku og þrýstið niður og snúið og takið upp þannig að hola myndist.
- Setjið jarðarberjafyllingu í hverja köku, ca. 1 tsk. er passlegt eða bara það sem er pláss fyrir.
- Sprautið kremi ofan á hverja köku og skreytið með Dr. Oetker pastel perlum og regnbogaskrauti.
