Dökkar múffur pakkaðar af súkkulaði

Þetta eru svona ekta múffur sem gott er að bjóða upp á í kaffitímanum eftir skóla eða á köldum helgardegi með rjúkandi heitum kaffibolla.

Það tekur enga stund að henda í deigið og það þarf ekkert að vesenast með neitt krem svo það er hægt að njóta þeirra á meðan þær eru ennþá vel volgar. Þær eru ekkert of sætar heldur þrátt fyrir töluvert magn af súkkulaði. Ég nota blöndu af dökku súkkulaði og mjólkursúkkulaði en það má vel nota bara eina tegund og jafnvel bæta við hnetum ef þið viljið.

Ég nota bakstursolíuna frá Rapunzel í deigið en ég nota yfirleitt olíu í staðinn fyrir smjör í bakstri þegar ég kem því við. Ástæðan fyrir því er einfaldlega sú að með olíunni verða kökurnar mýkri og haldast lengur mjúkar. Með smjörinu kemur auðvitað gott bragð sem erfitt er að skáka en því miður verða kökur sem innihalda bara smjör þurrar mjög fljótt og molna frekar.

Það er síðan eitt í viðbót sem ég verð að nefna. Í öllum súkkulaðibakstri er mjög mikilvægt að nota ríflegt magn af salti, svo ég tala nú ekki um ef olía er notuð í stað smjörs. Saltið ýtir undir súkkulaðibragðið og gerir allt betra!

Uppskriftaspjald

Prenta uppskrift

2 Vistaðu sem uppáhald

Dökkar múffur pakkaðar af súkkulaði

Erfiðleikastig: Beginner Undirbúningstími 15 mins Eldunartími 25 mins Heildartími 40 mins

Hitastig: 215  C Skammtar: 12

Innihaldsefni:

Servings

• 160 gr. 70% súkkulaði frá Rapunzel, saxað
• 100 gr. mjólkursúkkulaði frá Rapunzel, saxað
• 250 gr. hveiti
• 200 gr. sykur
• 40 gr. púðursykur
• 40 gr. kakó
• 1 tsk. matarsódi
• 1 tsk. lyftiduft
• 1 tsk. sjávarsalt
• 2 stór egg við stofuhita
• 180 gr. grísk jógúrt eða súrmjólk
• 130 ml. nýmjólk
• 120 ml. steikingar- og bakstursolía frá Rapunzel
• 2 tsk. vanilludropar

Leiðbeiningar

1. Byrjið á því að klippa út möffinsform úr bökunarpappír og setjið í möffins bakka í stærri kantinum, ef minni gerðin er notað þarf tvo bakka.
2. Hitið ofninn í 215°C blástur.
3. Saxið súkkulaðið og setjið til hliðar.
4. Blandið þurrefnum saman í skál.
5. Setjið egg, jógúrt, mjólk, olíu og vanilludropa saman við og hrærið í með sleif þar til deigið er samfellt.
6. Takið hluta af súkkulaðinu frá, nóg til þess að toppa möffinskökurnar með þegar deigið er komið í formin. Blandið restinni saman við deigið.
7. Skiptið deiginu jafnt í formin.
8. Bakið kökurnar fyrst í 5 mínútur á 215°C en lækkið svo hitann í 175°C og bakið áfram í 14-15 mín. Ef þið gerið minni kökur styttist baksturstíminn, fylgist vel með eftir 10 mín.
9. Kælið kökurnar í formunum í nokkrar mínútur, færið þær svo yfir á grind og njótið með góðu kaffi eða ískaldri mjólk.

Note

Ég nota stóran muffins bakka og deigið passar í 12 stórar múffur. Ef þið notið minni og venjulegu gerðina eru þetta örugglega 18 múffur eða jafnvel fleiri.