Espresso bananakaka með vanillu, kanil og kaffikremi

Kökur með kaffibragði eru bestar og ég reyni að troða kaffi í helst sem flest. Gott og vel, smá ýkjur en ég er mjög hrifin af öllu sem kaffibragð er af. Þessi blanda, bananar, vanilla, kanill og kaffi hljómar eins og eitthvað sem gæti alls ekki passað saman en því fer fjarri. Þetta er þvert á móti stórkostleg blanda sem ég mæli með að þið prófið. Kakan sjálf er mjög mjúk en aðeins þétt í sér. Kremið er síðan svo ólýsanlega gott að ég ætla ekki að reyna það. Aðferðin við það er aðeins öðruvísi en við eigum að venjast en passar svo vel með kökunni. Og líklega flestum kökum ef því er að skipta.

Botninn:

140g hveiti

1 tsk. lyftiduft

½ tsk. matarsódi

½ tsk. sjávarsalt

1 tsk. kanill

½ tsk. vanillukorn frá Rapunzel

120 ml mjólk

1 ½ msk. skyndikaffiduft

100g sykur

60 ml jurtaolía

1 stórt egg

2 meðalstórir, þroskaðir bananar

1 tsk. kakó frá Rapunzel, til að dusta yfir kökuna

Kremið:

85 g smjör

100g púðursykur

3 msk. mjólk

1 msk. skyndikaffiduft

¼ tsk. vanillukorn frá Rapunzel

240g flórsykur

Aðferð:

1. Við byrjum á að undirbúa kremið. Setjið smjör, púðursykur og 2 msk. af mjólkinni í lítinn pott. Bræðið saman við meðalhita og þegar blandan fer aðeins að bubbla takið þið pottinn af hellunni.
2. Hrærið vanillu og kaffi saman við.
3. Setjið blönduna í hitaþolna skál og kælið.
4. Hitið ofninn í 175°C blástur. Smyrjið 20cm hringlaga form og setjið til hliðar.
5. Blandið þurrefnunum saman í skál.
6. Setjið mjólkina í lítinn pott ásamt kaffiduftinu. Velgið mjólkina þar til kaffiduftið hefur leyst upp.
7. Stappið bananana og setjið aðeins til hliðar.
8. Í annarri skál þeytið saman sykur, olíu, vanillukorn, egg og kaffimjólkina. Setjið þurrefnin saman við ásamt stöppuðu bönununum.
9. Setjið deigið í formið og bakið í 30 mín eða þar til prjónn sem stungið er í kökuna kemur hreinn út.
10. Kælið botninn á grind.
11. Þegar púðursykursblandan er orðin köld er hægt að klára að útbúa kremið.
12. Setjið blönduna í skál ásamt flórsykrinum og 1 msk. af mjólk. Þeytið saman þar til kremið er orðin létt og ljóst.
13. Smyrjið kreminu á kalda kökuna og dustið kakódufti yfir. Berið fram með góðum kaffibolla.

Unnið í samstarfi við Gerum daginn girnilegan.