Valgerður Gréta G. Gröndal Ef það er eitthvað sem er alltaf vinsælt á mínu heimili þá eru það kjúklinga- og pastaréttir af öllu tagi. Og hvers vegna ekki að gera þá geggjaða útgáfu af lasanja? Aðeins öðruvísi en þessi hefðbundna þar sem ég nota kjúkling en sleppi rauðu sósunni. Í staðinn nota ég vel ef hvítri sósu sem fer ótrúlega vel með kjúklingnum, sveppunum og spínatinu. Aðalmálið er svo auðvitað ostur og þá mikið af honum. Bæði á milli laganna og ofan á. Ég lofa að þessi á eftir að slá í gegn!
Innihald:
- 500g eldaður kjúklingur, það er snjallt að nota afganga eða kjöt af heilum kjúkling
- 1 msk. ólífuolía
- 1 laukur, meðalstór
- 4 hvítlauksrif
- 130g sveppir
- 125g ferskt spínat
- 2 tsk. óreganó
- 1 tsk. ítölsk kryddblanda
- 500ml vatn
- 2 kjúklingateningar
- 30g hveiti
- 2 dl. nýmjólk
- 2-3 msk. rifinn parmesan
- Salt og nýmalaður svartur pipar
- Lasanjaplötur sem ekki þarf að forsjóða
- Pizzaostur frá Gott í matinn, magn eftir smekk
Aðferð:
- Byrjið á því að græja kjúklinginn. Ef þið notið kjöt af heilum kjúkling, rífið það þá af eða eldið heilar bringur og rífið svo í sundur með tveimur göfflum. Ég mæli ekki með því að skera bringur í bita og steikja svo, áferðin verður ekki eins góð.
- Hitið ofninn í 180°C blástur.
- Saxið laukinn smátt og hitið olíuna á pönnu. Steikið laukinn við meðalhita þar til hann verður glær.
- Saxið sveppina og geymið aðeins til hliðar. Saxið hvítlaukinn smátt og bætið út á pönnuna. Steikið í 1 mín og bætið þá sveppunum saman við. Setjið örlítið salt og pipar yfir grænmetið og steikið saman í smástund. Bætið þá óreganó og ítalskri kryddblöndu út á og hrærið.
- Bætið spínatinu út á pönnuna. Hrærið í því þar til það hefur mýkst og skroppið saman.
- Setjið þá eldaða kjúklinginn út á pönnuna og steikið í 2-3 mín með grænmetinu. Setjið þá pönnuna til hliðar.
- Hitið vatnið að suðu í litlum potti og setjið kjúklingateningana saman við. Hrærið þar til teningarnir eru uppleystir. Takið þá 1 dl. af soðinu til hliðar.
- Setjið hveiti í skál og hrærið 1 dl. af soðinu smám saman við hveitið.
- Á meðan soðið mallar rólega, hrærið þá soð/hveitiblöndunni saman við. Pískið varlega á meðan þið bætið nýmjólkinni út í. Látið sósuna malla í ca. 5 mín þar til hún hefur náð góðri þykkt. Bætið þá parmesanostinum saman við, smakkið til með salti og pipar og takið svo pottinn af hellunni.
Samsetning:
- Takið meðalstórt eldfast mót og smyrjið góðu lagi af sósunni í botninn.
- Dreifið 1/3 af kjúklingnum yfir sósuna og dreifið aðeins af rifnum osti yfir.
- Raðið þá lasanjaplötum yfir og endurtakið þannig að það séu tvö lög af lasanjaplötum.
- Klárið að setja saman lasanjað þannig að efst komi restin af sósunni, kjúklingnum og þá vel af rifnum osti.
- Bakið í ca. 35 mín eða þar til osturinn er orðinn fallega gylltur og lasanjaplöturnar fullsoðnar.
- Berið fram með fersku salati, snittubrauði og rifnum parmesan.
Unnið í samstarfi við Gott í matinn.