Valgerður Gréta G. Gröndal Hvað er betra en heimagert kartöflusalat með vel grilluðum lambakótilettum? Fátt segi ég. Og það er fátt sem er meira lýsandi fyrir íslenskt grillsumar. Hér er ekkert verið að flækja hlutina. Sósan á kartöflusalatinu nægir sem sósa á kjötið og því lét ég það nægja en ég ætla samt ekkert að stoppa ykkur í að skella smá sósu á það. Mér finnst best ef lambakótiletturnar verða svolítið dökkar og krispí en það er auðvitað smekksatriði eins og allt annað. Þetta er bara heiðarlegt íslenskt sumargrill eins og það gerist best!
Innihald:
1-2 pakkningar lambakótilettur með suðrænni kryddblöndu frá Kjarnafæði
4 maískólfar
Smjör
Flögusalt
Aðferð:
- Takið maísinn úr frysti og látið þá þiðna á borði eða notið örbylgjuofninn til að þýða þá.
- Takið kjötið úr kælinum og fitusnyrtið ef þarf.
- Hitið grillið vel og setjið maísinn á grillið. Leyfið maísnum að vera góða stund á grillinu eða þar til hann fer að dökkna.
- Setjið kjötið á grillið. Sneiðarnar eru hvorki stórar né þykkar svo það tekur enga stund að grilla þær.
- Færið kjötið og maísinn upp á fat og berið fram með kartöflusalatinu. Það er mjög gott að smyrja maísinn með smjöri og flögusalti.
Klassískt kartöflusalat
900g kaldar kartöflur skornar í bita
130g majónes
180g 18% sýrður rjómi
4 tsk. dijon sinnep
1 tsk. grófkorna sinnep
2 saxaðir vorlaukar
2-3 litlar súrar gúrkur, saxaðar
2 msk. fersk steinselja
1 msk. ferskt dill
Sjávarsalt og nýmalaður svartur pipar
Aðferð:
- Sjóðið kartöflurnar þar til þær eru soðnar í gegn. Skrælið þær og kælið alveg.
- Hrærið saman í skál majónesi, sýrðum rjóma, sinnepi og kryddi.
- Skerið kartöflurnar í bita og setjið í skál. Saxið vorlauk og súru gúrkurnar og setjið saman við.
- Hrærið dressingunni út í, mér finnst best að skilja 2-3 msk. eftir og sjá hvort ég þurfi að nota alla sósuna, það er smekksatriði hversu mikla sósu fólk vill hafa með kartöflusalati.
Unnið í samstarfi við Kjarnafæði.