Heimagerðir skinkusnúðar með osti

Að baka brauðmeti heima er bæði auðvelt og hagkvæmt. Yfirleitt er hægt að frysta afraksturinn og taka út eftir þörfum. Þessir dásamlegu skinkusnúðar eru ótrúlega vinsælir á mínu heimili og það er algert uppáhald að taka þá með í nesti. Og ef ég á þá til í frystinum gríp ég þá stundum þegar ég nenni ekki að elda og hef þá súpu með.

Manitoba hveitið frá Kornax er fullkomið í allan gerbakstur, hvort sem það er súrdeig eða bakstur með tilbúnu geri. Í því er hærra próteininnihald en í þessu rauða og það gerir það að verkum að afraksturinn verður mýkri og loftmeiri.

Innihald:

600g Manitoba hveiti frá Kornax
100g Heilhveiti frá Kornax
1 og 1/2 tsk. sjávarsalt (minnkið magn ef þið notið venjulegt borðsalt)
4 tsk. þurrger
20g sykur
4 dl. volgt vatn, um 38°C
1 dl. ólífuolía
200g smurostur, tegund eftir smekk
250g skinka, skorin í litla bita
Rifinn ostur, tegund eftir smekk, ég nota um 200g í allt + auka til að dreifa yfir snúðana
1 egg

Aðferð:

Setjið þurrefni saman í hrærivélaskál og hrærið aðeins með króknum. Setjið vatn og olíu saman við og látið vinna á hægum hraða í að minnsta kosti 5 mín.
Takið deigið uppúr og mótið kúlu og setjið aftur í skálina og hyljið með plastfilmu. Látið hefast á hlýjum stað í 45 mín.
Takið deigið uppúr og fletjið það út í ferhyrning.
Smyrjið deigið jafnt með smurostinum.
Stráið þá skinkunni yfir og dreifið rifnum osti yfir, passið að geyma ost til þess að strá yfir snúðana fyrir bökun. .
Rúllið upp lengjunni og skerið í tvennt, og svo aftur í tvennt osfrv. Setjið snúðana á bökunarplötu klædda bökunarpappír með góðu millibili.
Þegar allir snúðarnir eru komnir á plötu pensla ég þá með sundurslegnu eggi og dreifi rifnum osti yfir.
Hitið ofninn í 40°C og setjið plöturnar inn. Úðið yfir snúðana með vatni og aðeins inn í ofninn. Látið hefast í ofninum í ca. 40 mín.
Takið plöturnar út og hitið ofninn í 220°C. Setjið snúðana inn og bakið þar til osturinn er gylltur en það eru kannski 10 -12 mín, tíminn fer eftir ofnum.
Þessi eru dásamlegir í nesti, barnaafmælið eða jafnvel súpum. Þeir geymast vel í frysti og þá er snjallt að hita þá upp í smá stund í ofninum.