Valgerður Gréta G. Gröndal Þessar litlu ostakökur eru sannkölluð sumarveisla – silkimjúkar, ferskar og fallegar! Nýi rjómaosturinn frá MS með hvítu súkkulaði fær að njóta sín til fulls í þessari einföldu en ljúffengu uppskrift þar sem hann blandast þeyttum rjóma og bræddu súkkulaði í léttri fyllingu.
Með heilhveitikexinu kemur smá kröns og fersk ber eins og jarðarber, hindber og bláber setja svo punktinn yfir i-ið. Þær henta fullkomlega í veislur, matarboðin eða bara þegar þig langar í eitthvað einfalt og ljúffengt eftir matinn. Hægt er að undirbúa ostakökurnar með fyrirvara og skreyta með berjum rétt fyrir framreiðslu.
Innihald:
- 125g heilhveitikex
- 40g brætt smjör
- 100g flórsykur
- 250 ml. rjómi
- 2 tsk. vanilludropar
- 200g rjómaostur með hvítu súkkulaði frá MS
- 50g hvítt súkkulaði, brætt
- Fersk ber – jarðarber, brómber, bláber og hindber
Aðferð:
1. Setjið kexið í poka og rúllið yfir það með kökukefli. Einnig er hægt að vinna það í matvinnsluvél en fyrir þessar kökur finnst mér betra ef kexmylsnan er ekki of smátt mulin.
2. Hellið mylsnunni í skál og blandið bræddu smjörinu saman við.
3. Setjið rjóma, flórsykur og vanillu í skál og stífþeytið. Bætið rjómaostinum saman við og þeytið þar til allt er samlagað.
4. Bræðið súkkulaðið, leyfið mesta hitanum að rjúka úr því. Setjið þá 1-2 msk. af ostakökublöndunni saman við súkkulaðið til að tempra það. Bætið svo þeirri blöndu út í ostakökublönduna og blandið varlega með sleikju.
5. Takið fram lítil glös, það skiptir ekki öllu máli af hvaða stærð þau eru – minni glös = fleiri ostakökur.
6. Setjið fyrst mylsnu í botninn og því næst ostakökublöndu. Endurtakið en setjið þykkara lag af ostakökublöndunni efst. Skreytið með ferskum berjum.
7. Hægt er að gera ostakökurnar með góðum fyrirvara og geyma í kæli. Skreytið þá með berjum rétt áður en þær eru bornar fram.
Unnið í samstarfi við Gott í matinn.