Valgerður Gréta G. Gröndal Það veitir svo sannarlega ekki af því að fá hugmyndir að einföldum og bragðgóðum kvöldmat sem hentar allri fjölskyldunni. Þessi kjúklingabaka er með einfaldari kjúklingaréttum sem hægt er að útbúa og að auki er hann ótrúlega góður og stútfullur af próteini. Það er hægt að flýta enn meira fyrir sér og nota kjöt af tilbúnum kjúklingi sem hægt er að grípa með sér í mörgum verslunum eða jafnvel nota afganga sem gætu leynst í kælinum. Kotasælan og rjómaosturinn sjá til þess að rétturinn sé extra djúsí og próteinríkur.
Innihald:
500g kotasæla frá MS
100g rjómaostur með svörtum pipar
1 bréf tacokrydd
350g eldaður kjúklingur, rifinn
85g maískorn
½ rauð paprika
7 cm blaðlaukur, græni hlutinn
50g rifinn ostur
Ofan á:
100g rifinn ostur
50g mexíkósk rifin ostablanda
Nokkrar nachosflögur, muldar
Ferskt kóríander, má sleppa
Aðferð:
- Hitið ofninn í 210°C blástur.
- Rífið niður kjúklinginn og skerið grænmetið. Ég notaði eldaðar kjúklingabringur en það er einnig ljómandi gott að nota kjöt af tilbúnum elduðum kjúkling.
- Setjið kotasælu, rjómaost og tacokrydd saman í skál og blandið saman með töfrasprota.
- Blandið kjúklingnum, rifna ostinum og grænmetinu saman við kotasælublönduna.
- Smyrjið út í eldfast form og toppið með rifnum ostur, mexíkóskri ostablöndu og muldum nachos flögum.
- Bakið í ofni í 25-30 mín. Takið fatið út og stráið söxuðu fersku kóríander yfir ef vill.
- Berið fram með hrísgrjónum, nachosflögum, maískorni, salsa, sýrðum rjóma og fersku kóríander.
Unnið í samstarfi við Gott í matinn.