Valgerður Gréta G. Gröndal Það er fátt sem passar betur saman en ostur, döðlur og ristaðar pekanhnetur og þessi hátíðlegi forréttur tikkar í öll boxin. Einfaldur, bragðgóður og fallegur. Já, hann er nefnilega ansi fallegur á veisluborðinu og það skemmir ekki fyrir þegar gesti ber að garði. Það er auðvitað hægt að nota hvaða hringlaga hvítmygluost sem er en ég mæli sérstaklega með því að nota Dala Camembert en hann er mjög bragðgóður en mildur.
Innihald:
1 stk. Dala Camembert
40g ristaðar pekanhnetur
70g döðlur
1 dl fersk steinselja
½ dl. fljótandi hunang
Nokkrar saltstangir
Aðferð:
- Hitið ofninn í 180°C. Setjið hneturnar á ofnplötu og ristið í 8-10 mín. Takið plötuna út og kælið.
- Skerið ostinn í 6 hluta eins og þið séuð að skera pítsusneiðar. Takið þá hverja sneið og kljúfið.
- Saxið döðlurnar, hneturnar og steinseljuna smátt. Setjið hunangið á disk.
- Brjótið saltstangirnar í hæfilega lengd og stingið í breiðari endann á ostsneiðunum.
- Dýfið sneiðunum öðru megin í hunangið og passið að það nái að þekja alla sneiðina.
- Dýfið þeim þar næst í hnetublönduna og leggið á disk.
- Berið strax fram.
Unnið í samstarfi við Gott í matinn.